ҚР Ұлттық қорғаныс университетіне Руанда Республикасының делегациясы ресми сапармен келді. Кездесу барысында әскери білім беру саласындағы ынтымақтастық мәселелері талқыланды.
Шетелдік қонақтар университеттің қалыптасу тарихына үңіліп, оқу-техникалық базасы мен қазіргі уақытта әскери кадрларды даярлау жүйесінің жұмысымен танысты. Оларға жоғары командалық құрамды дайындаудың заманауи әдістемелері, ғылыми-зерттеу жұмыстарының негізгі бағыттары және білім беру процесін ұйымдастырудағы озық тәжірибе таныстырылды.
Кездесу аясында тараптар Ұлттық қорғаныс университеті мен Руанда Қарулы күштері Қорғаныс университеті арасындағы ынтымақтастықты дамыту перспективаларын жан-жақты қарастырды. Соның ішінде жоғары командалық курстардың тыңдаушылары деңгейінде білім алуды ұйымдастыру, докторантурада оқыту, халықаралық ғылыми-тәжірибелік конференцияларға қатысу және тілдік курстар өткізу мүмкіндіктері талқыланды.
Келіссөздердің қорытындысы бойынша тараптар әскери білім мен ғылым саласында ынтымақтастықты нығайтуға және дамытуға өзара мүдделілік танытқанын растады.